Sacred Texts  Bible  Index 
Polyglot  KJV  Sep  Vul 

Deuteronomy (Devarim) Index
  Previous  Next 

Tanach (Hebrew): Deuteronomy (Devarim) Chapter 9

1 ‏שְׁמַ֣ע יִשְׂרָאֵ֗ל אַתָּ֨ה עֹבֵ֤ר הַיּוֹם֙ אֶת־הַיַּרְדֵּ֔ן לָבֹא֙ לָרֶ֣שֶׁת גּוֹיִ֔ם גְּדֹלִ֥ים וַעֲצֻמִ֖ים מִמֶּ֑ךָּ עָרִ֛ים גְּדֹלֹ֥ת וּבְצֻרֹ֖ת בַּשָּׁמָֽיִם׃

2 ‏עַֽם־גָּד֥וֹל וָרָ֖ם בְּנֵ֣י עֲנָקִ֑ים אֲשֶׁ֨ר אַתָּ֤ה יָדַ֙עְתָּ֙ וְאַתָּ֣ה שָׁמַ֔עְתָּ מִ֣י יִתְיַצֵּ֔ב לִפְנֵ֖י בְּנֵ֥י עֲנָֽק׃

3 ‏וְיָדַעְתָּ֣ הַיּ֗וֹם כִּי֩ יְהוָ֨ה אֱלֹהֶ֜יךָ הֽוּא־הָעֹבֵ֤ר לְפָנֶ֙יךָ֙ אֵ֣שׁ אֹֽכְלָ֔ה ה֧וּא יַשְׁמִידֵ֛ם וְה֥וּא יַכְנִיעֵ֖ם לְפָנֶ֑יךָ וְהֽוֹרַשְׁתָּ֤ם וְהַֽאַבַדְתָּם֙1 מַהֵ֔ר כַּאֲשֶׁ֛ר דִּבֶּ֥ר יְהוָ֖ה לָֽךְ׃

4 ‏אַל־תֹּאמַ֣ר בִּלְבָבְךָ֗ בַּהֲדֹ֣ף יְהוָה֩ אֱלֹהֶ֨יךָ אֹתָ֥ם׀ מִלְּפָנֶיךָ֮ לֵאמֹר֒ בְּצִדְקָתִי֙ הֱבִיאַ֣נִי יְהוָ֔ה לָרֶ֖שֶׁת אֶת־הָאָ֣רֶץ הַזֹּ֑את וּבְרִשְׁעַת֙ הַגּוֹיִ֣ם הָאֵ֔לֶּה יְהוָ֖ה מוֹרִישָׁ֥ם3 מִפָּנֶֽיךָ׃

5 ‏לֹ֣א בְצִדְקָתְךָ֗ וּבְיֹ֙שֶׁר֙ לְבָ֣בְךָ֔ אַתָּ֥ה בָ֖א לָרֶ֣שֶׁת אֶת־אַרְצָ֑ם כִּ֞י בְּרִשְׁעַ֣ת׀ הַגּוֹיִ֣ם הָאֵ֗לֶּה יְהוָ֤ה אֱלֹהֶ֙יךָ֙ מוֹרִישָׁ֣ם מִפָּנֶ֔יךָ וּלְמַ֜עַן הָקִ֣ים אֶת־הַדָּבָ֗ר אֲשֶׁ֨ר נִשְׁבַּ֤ע יְהוָה֙ לַאֲבֹתֶ֔יךָ לְאַבְרָהָ֥ם לְיִצְחָ֖ק וּֽלְיַעֲקֹֽב׃

6 ‏וְיָדַעְתָּ֗ כִּ֠י לֹ֤א בְצִדְקָֽתְךָ֙ יְהוָ֣ה אֱ֠לֹהֶיךָ נֹתֵ֨ן לְךָ֜ אֶת־הָאָ֧רֶץ הַטּוֹבָ֛ה הַזֹּ֖את לְרִשְׁתָּ֑הּ כִּ֥י עַם־קְשֵׁה־עֹ֖רֶף אָֽתָּה׃

7 ‏זְכֹר֙ אַל־תִּשְׁכַּ֔ח אֵ֧ת אֲשֶׁר־הִקְצַ֛פְתָּ אֶת־יְהוָ֥ה אֱלֹהֶ֖יךָ בַּמִּדְבָּ֑ר לְמִן־הַיּ֞וֹם אֲשֶׁר־יָצָ֣אתָ׀ מֵאֶ֣רֶץ מִצְרַ֗יִם עַד־בֹּֽאֲכֶם֙ עַד־הַמָּק֣וֹם הַזֶּ֔ה מַמְרִ֥ים הֱיִיתֶ֖ם עִם־יְהוָֽה׃

8 ‏וּבְחֹרֵ֥ב הִקְצַפְתֶּ֖ם אֶת־יְהוָ֑ה וַיִּתְאַנַּ֧ף יְהוָ֛ה בָּכֶ֖ם לְהַשְׁמִ֥יד אֶתְכֶֽם׃

9 ‏בַּעֲלֹתִ֣י הָהָ֗רָה לָקַ֜חַת לוּחֹ֤ת הָֽאֲבָנִים֙ לוּחֹ֣ת הַבְּרִ֔ית אֲשֶׁר־כָּרַ֥ת יְהוָ֖ה עִמָּכֶ֑ם וָאֵשֵׁ֣ב בָּהָ֗ר אַרְבָּעִ֥ים יוֹם֙ וְאַרְבָּעִ֣ים לַ֔יְלָה לֶ֚חֶם לֹ֣א אָכַ֔לְתִּי וּמַ֖יִם לֹ֥א שָׁתִֽיתִי׃

10 ‏וַיִּתֵּ֨ן יְהוָ֜ה אֵלַ֗י אֶת־שְׁנֵי֙ לוּחֹ֣ת הָֽאֲבָנִ֔ים כְּתֻבִ֖ים בְּאֶצְבַּ֣ע אֱלֹהִ֑ים וַעֲלֵיהֶ֗ם כְּֽכָל־הַדְּבָרִ֡ים אֲשֶׁ֣ר דִּבֶּר֩ יְהוָ֨ה עִמָּכֶ֥ם בָּהָ֛ר מִתּ֥וֹךְ הָאֵ֖שׁ בְּי֥וֹם הַקָּהָֽל׃

11 ‏וַיְהִ֗י מִקֵּץ֙ אַרְבָּעִ֣ים י֔וֹם וְאַרְבָּעִ֖ים לָ֑יְלָה נָתַ֨ן יְהוָ֜ה אֵלַ֗י אֶת־שְׁנֵ֛י לֻחֹ֥ת הָאֲבָנִ֖ים לֻח֥וֹת הַבְּרִֽית׃

12 ‏וַיֹּ֨אמֶר יְהוָ֜ה אֵלַ֗י ק֣וּם רֵ֤ד מַהֵר֙ מִזֶּ֔ה כִּ֚י שִׁחֵ֣ת עַמְּךָ֔ אֲשֶׁ֥ר הוֹצֵ֖אתָ מִמִּצְרָ֑יִם סָ֣רוּ מַהֵ֗ר מִן־הַדֶּ֙רֶךְ֙ אֲשֶׁ֣ר צִוִּיתִ֔ם עָשׂ֥וּ לָהֶ֖ם מַסֵּכָֽה׃

13 ‏וַיֹּ֥אמֶר יְהוָ֖ה אֵלַ֣י לֵאמֹ֑ר רָאִ֙יתִי֙ אֶת־הָעָ֣ם הַזֶּ֔ה וְהִנֵּ֥ה עַם־קְשֵׁה־עֹ֖רֶף הֽוּא׃

14 ‏הֶ֤רֶף מִמֶּ֙נִּי֙ וְאַשְׁמִידֵ֔ם וְאֶמְחֶ֣ה אֶת־שְׁמָ֔ם מִתַּ֖חַת הַשָּׁמָ֑יִם וְאֶֽעֱשֶׂה֙ אֽוֹתְךָ֔ לְגוֹי־עָצ֥וּם וָרָ֖ב מִמֶּֽנּוּ׃

15 ‏וָאֵ֗פֶן וָֽאֵרֵד֙ מִן־הָהָ֔ר וְהָהָ֖ר בֹּעֵ֣ר בָּאֵ֑שׁ וּשְׁנֵי֙ לֻחֹ֣ת הַבְּרִ֔ית עַ֖ל שְׁתֵּ֥י יָדָֽי׃

16 ‏וָאֵ֗רֶא וְהִנֵּ֤ה חֲטָאתֶם֙ לַיהוָ֣ה אֱלֹֽהֵיכֶ֔ם עֲשִׂיתֶ֣ם לָכֶ֔ם עֵ֖גֶל מַסֵּכָ֑ה סַרְתֶּ֣ם מַהֵ֔ר מִן־הַדֶּ֕רֶךְ אֲשֶׁר־צִוָּ֥ה יְהוָ֖ה אֶתְכֶֽם׃

17 ‏וָאֶתְפֹּשׂ֙ בִּשְׁנֵ֣י הַלֻּחֹ֔ת וָֽאַשְׁלִכֵ֔ם מֵעַ֖ל שְׁתֵּ֣י יָדָ֑י וָאֲשַׁבְּרֵ֖ם לְעֵינֵיכֶֽם׃

18 ‏וָֽאֶתְנַפַּל֩ לִפְנֵ֨י יְהוָ֜ה כָּרִאשֹׁנָ֗ה אַרְבָּעִ֥ים יוֹם֙ וְאַרְבָּעִ֣ים לַ֔יְלָה לֶ֚חֶם לֹ֣א אָכַ֔לְתִּי וּמַ֖יִם לֹ֣א שָׁתִ֑יתִי עַ֤ל כָּל־חַטַּאתְכֶם֙ אֲשֶׁ֣ר חֲטָאתֶ֔ם לַעֲשׂ֥וֹת הָרַ֛ע בְּעֵינֵ֥י יְהוָ֖ה לְהַכְעִיסֽוֹ׃

19 ‏כִּ֣י יָגֹ֗רְתִּי מִפְּנֵ֤י הָאַף֙ וְהַ֣חֵמָ֔ה אֲשֶׁ֨ר קָצַ֧ף יְהוָ֛ה עֲלֵיכֶ֖ם לְהַשְׁמִ֣יד אֶתְכֶ֑ם וַיִּשְׁמַ֤ע יְהוָה֙ אֵלַ֔י גַּ֖ם בַּפַּ֥עַם הַהִֽוא׃

20 ‏וּֽבְאַהֲרֹ֗ן הִתְאַנַּ֧ף יְהוָ֛ה מְאֹ֖ד לְהַשְׁמִיד֑וֹ וָֽאֶתְפַּלֵּ֛ל גַּם־בְּעַ֥ד אַהֲרֹ֖ן בָּעֵ֥ת הַהִֽוא׃

21 ‏וְֽאֶת־חַטַּאתְכֶ֞ם אֲשֶׁר־עֲשִׂיתֶ֣ם אֶת־הָעֵ֗גֶל לָקַחְתִּי֮ וָאֶשְׂרֹ֣ף אֹת֣וֹ׀ בָּאֵשׁ֒ וָאֶכֹּ֨ת אֹת֤וֹ טָחוֹן֙ הֵיטֵ֔ב עַ֥ד אֲשֶׁר־דַּ֖ק לְעָפָ֑ר וָֽאַשְׁלִךְ֙ אֶת־עֲפָר֔וֹ אֶל־הַנַּ֖חַל הַיֹּרֵ֥ד מִן־הָהָֽר׃

22 ‏וּבְתַבְעֵרָה֙ וּבְמַסָּ֔ה וּבְקִבְרֹ֖ת הַֽתַּאֲוָ֑ה מַקְצִפִ֥ים הֱיִיתֶ֖ם אֶת־יְהוָֽה׃

23 ‏וּבִשְׁלֹ֨חַ יְהוָ֜ה אֶתְכֶ֗ם מִקָּדֵ֤שׁ בַּרְנֵ֙עַ֙ לֵאמֹ֔ר עֲלוּ֙ וּרְשׁ֣וּ אֶת־הָאָ֔רֶץ אֲשֶׁ֥ר נָתַ֖תִּי לָכֶ֑ם וַתַּמְר֗וּ אֶת־פִּ֤י יְהוָה֙ אֱלֹ֣הֵיכֶ֔ם וְלֹ֤א הֶֽאֱמַנְתֶּם֙ ל֔וֹ וְלֹ֥א שְׁמַעְתֶּ֖ם בְּקֹלֽוֹ׃

24 ‏מַמְרִ֥ים הֱיִיתֶ֖ם עִם־יְהוָ֑ה מִיּ֖וֹם דַּעְתִּ֥י אֶתְכֶֽם׃

25 ‏וָֽאֶתְנַפַּ֞ל לִפְנֵ֣י יְהוָ֗ה אֵ֣ת אַרְבָּעִ֥ים הַיּ֛וֹם וְאֶת־אַרְבָּעִ֥ים הַלַּ֖יְלָה אֲשֶׁ֣ר הִתְנַפָּ֑לְתִּי כִּֽי־אָמַ֥ר יְהוָ֖ה לְהַשְׁמִ֥יד אֶתְכֶֽם׃

26 ‏וָאֶתְפַּלֵּ֣ל אֶל־יְהוָה֮ וָאֹמַר֒ אֲדֹנָ֣י יְהוִ֗ה אַל־תַּשְׁחֵ֤ת עַמְּךָ֙ וְנַחֲלָ֣תְךָ֔ אֲשֶׁ֥ר פָּדִ֖יתָ בְּגָדְלֶ֑ךָ אֲשֶׁר־הוֹצֵ֥אתָ מִמִּצְרַ֖יִם בְּיָ֥ד חֲזָקָֽה׃

27 ‏זְכֹר֙ לַעֲבָדֶ֔יךָ לְאַבְרָהָ֥ם לְיִצְחָ֖ק וּֽלְיַעֲקֹ֑ב אַל־תֵּ֗פֶן אֶל־קְשִׁי֙ הָעָ֣ם הַזֶּ֔ה וְאֶל־רִשְׁע֖וֹ וְאֶל־חַטָּאתֽוֹ׃

28 ‏פֶּן־יֹאמְר֗וּ הָאָרֶץ֮ אֲשֶׁ֣ר הוֹצֵאתָ֣נוּ מִשָּׁם֒ מִבְּלִי֙ יְכֹ֣לֶת יְהוָ֔ה לַהֲבִיאָ֕ם אֶל־הָאָ֖רֶץ אֲשֶׁר־דִּבֶּ֣ר לָהֶ֑ם וּמִשִּׂנְאָת֣וֹ אוֹתָ֔ם הוֹצִיאָ֖ם לַהֲמִתָ֥ם בַּמִּדְבָּֽר׃

29 ‏וְהֵ֥ם עַמְּךָ֖ וְנַחֲלָתֶ֑ךָ אֲשֶׁ֤ר הוֹצֵ֙אתָ֙ בְּכֹחֲךָ֣ הַגָּדֹ֔ל וּבִֽזְרֹעֲךָ֖ הַנְּטוּיָֽה׃ פ

1 šəma‘ yiśərā’ēl ’atâ ‘ōḇēr hayywōm ’eṯ-hayyarədēn lāḇō’ lārešeṯ gwōyim gəḏōlîm wa‘ăṣumîm mimmeḵḵā ‘ārîm gəḏōlōṯ ûḇəṣurōṯ baššāmāyim:

2 ‘am-gāḏwōl wārām bənê ‘ănāqîm ’ăšer ’atâ yāḏa‘ətā wə’atâ šāma‘ətā mî yiṯəyaṣṣēḇ lifənê bənê ‘ănāq:

3 wəyāḏa‘ətā hayywōm kî yəhwâ ’ĕlōheyḵā hû’-hā‘ōḇēr ləfāneyḵā ’ēš ’ōḵəlâ hû’ yašəmîḏēm wəhû’ yaḵənî‘ēm ləfāneyḵā wəhwōrašətām wəha’aḇaḏətām1 mahēr ka’ăšer diber yəhwâ lāḵə:

4 ’al-tō’mar biləḇāḇəḵā bahăḏōf yəhwâ ’ĕlōheyḵā ’ōṯām| milləfāneyḵā lē’mōr bəṣiḏəqāṯî hĕḇî’anî yəhwâ lārešeṯ ’eṯ-hā’āreṣ hazzō’ṯ ûḇərišə‘aṯ hagwōyim hā’ēlleh yəhwâ mwōrîšām3 mipāneyḵā:

5 lō’ ḇəṣiḏəqāṯəḵā ûḇəyōšer ləḇāḇəḵā ’atâ ḇā’ lārešeṯ ’eṯ-’arəṣām kî bərišə‘aṯ| hagwōyim hā’ēlleh yəhwâ ’ĕlōheyḵā mwōrîšām mipāneyḵā ûləma‘an hāqîm ’eṯ-hadāḇār ’ăšer nišəba‘ yəhwâ la’ăḇōṯeyḵā lə’aḇərâām ləyiṣəḥāq ûləya‘ăqōḇ:

6 wəyāḏa‘ətā kî lō’ ḇəṣiḏəqāṯəḵā yəhwâ ’ĕlōheyḵā nōṯēn ləḵā ’eṯ-hā’āreṣ haṭṭwōḇâ hazzō’ṯ lərišətāh kî ‘am-qəšēh-‘ōref ’ātâ:

7 zəḵōr ’al-tišəkaḥ ’ēṯ ’ăšer-hiqəṣafətā ’eṯ-yəhwâ ’ĕlōheyḵā bammiḏəbār ləmin-hayywōm ’ăšer-yāṣā’ṯā| mē’ereṣ miṣərayim ‘aḏ-bō’ăḵem ‘aḏ-hammāqwōm hazzeh mamərîm hĕyîṯem ‘im-yəhwâ:

8 ûḇəḥōrēḇ hiqəṣafətem ’eṯ-yəhwâ wayyiṯə’annaf yəhwâ bāḵem ləhašəmîḏ ’eṯəḵem:

9 ba‘ălōṯî hâārâ lāqaḥaṯ lûḥōṯ hā’ăḇānîm lûḥōṯ habərîṯ ’ăšer-kāraṯ yəhwâ ‘immāḵem wā’ēšēḇ bâār ’arəbā‘îm ywōm wə’arəbā‘îm layəlâ leḥem lō’ ’āḵalətî ûmayim lō’ šāṯîṯî:

10 wayyitēn yəhwâ ’ēlay ’eṯ-šənê lûḥōṯ hā’ăḇānîm kəṯuḇîm bə’eṣəba‘ ’ĕlōhîm wa‘ălêhem kəḵāl-hadəḇārîm ’ăšer diber yəhwâ ‘immāḵem bâār mitwōḵə hā’ēš bəywōm haqqâāl:

11 wayəhî miqqēṣ ’arəbā‘îm ywōm wə’arəbā‘îm lāyəlâ nāṯan yəhwâ ’ēlay ’eṯ-šənê luḥōṯ hā’ăḇānîm luḥwōṯ habərîṯ:

12 wayyō’mer yəhwâ ’ēlay qûm rēḏ mahēr mizzeh kî šiḥēṯ ‘amməḵā ’ăšer hwōṣē’ṯā mimmiṣərāyim sārû mahēr min-hadereḵə ’ăšer ṣiûîṯim ‘āśû lâem massēḵâ:

13 wayyō’mer yəhwâ ’ēlay lē’mōr rā’îṯî ’eṯ-hā‘ām hazzeh wəhinnēh ‘am-qəšēh-‘ōref hû’:

14 heref mimmennî wə’ašəmîḏēm wə’eməḥeh ’eṯ-šəmām mitaḥaṯ haššāmāyim wə’e‘ĕśeh ’wōṯəḵā ləḡwōy-‘āṣûm wārāḇ mimmennû:

15 wā’ēfen wā’ērēḏ min-hâār wəhâār bō‘ēr bā’ēš ûšənê luḥōṯ habərîṯ ‘al šətê yāḏāy:

16 wā’ēre’ wəhinnēh ḥăṭā’ṯem layhwâ ’ĕlōhêḵem ‘ăśîṯem lāḵem ‘ēḡel massēḵâ sarətem mahēr min-hadereḵə ’ăšer-ṣiûâ yəhwâ ’eṯəḵem:

17 wā’eṯəpōś bišənê halluḥōṯ wā’ašəliḵēm mē‘al šətê yāḏāy wā’ăšabərēm lə‘ênêḵem:

18 wā’eṯənapal lifənê yəhwâ kāri’šōnâ ’arəbā‘îm ywōm wə’arəbā‘îm layəlâ leḥem lō’ ’āḵalətî ûmayim lō’ šāṯîṯî ‘al kāl-ḥaṭṭa’ṯəḵem ’ăšer ḥăṭā’ṯem la‘ăśwōṯ hāra‘ bə‘ênê yəhwâ ləhaḵə‘îswō:

19 kî yāḡōrətî mipənê hā’af wəhaḥēmâ ’ăšer qāṣaf yəhwâ ‘ălêḵem ləhašəmîḏ ’eṯəḵem wayyišəma‘ yəhwâ ’ēlay gam bapa‘am hahiw’:

20 ûḇə’ahărōn hiṯə’annaf yəhwâ mə’ōḏ ləhašəmîḏwō wā’eṯəpallēl gam-bə‘aḏ ’ahărōn bā‘ēṯ hahiw’:

21 wə’eṯ-ḥaṭṭa’ṯəḵem ’ăšer-‘ăśîṯem ’eṯ-hā‘ēḡel lāqaḥətî wā’eśərōf ’ōṯwō| bā’ēš wā’ekōṯ ’ōṯwō ṭāḥwōn hêṭēḇ ‘aḏ ’ăšer-daq lə‘āfār wā’ašəliḵə ’eṯ-‘ăfārwō ’el-hannaḥal hayyōrēḏ min-hâār:

22 ûḇəṯaḇə‘ērâ ûḇəmassâ ûḇəqiḇərōṯ hata’ăwâ maqəṣifîm hĕyîṯem ’eṯ-yəhwâ:

23 ûḇišəlōḥa yəhwâ ’eṯəḵem miqqāḏēš barənē‘a lē’mōr ‘ălû ûrəšû ’eṯ-hā’āreṣ ’ăšer nāṯatî lāḵem watamərû ’eṯ-pî yəhwâ ’ĕlōhêḵem wəlō’ he’ĕmanətem lwō wəlō’ šəma‘ətem bəqōlwō:

24 mamərîm hĕyîṯem ‘im-yəhwâ mîywōm da‘ətî ’eṯəḵem:

25 wā’eṯənapal lifənê yəhwâ ’ēṯ ’arəbā‘îm hayywōm wə’eṯ-’arəbā‘îm hallayəlâ ’ăšer hiṯənapālətî kî-’āmar yəhwâ ləhašəmîḏ ’eṯəḵem:

26 wā’eṯəpallēl ’el-yəhwâ wā’ōmar ’ăḏōnāy yəhwih ’al-tašəḥēṯ ‘amməḵā wənaḥălāṯəḵā ’ăšer pāḏîṯā bəḡāḏəleḵā ’ăšer-hwōṣē’ṯā mimmiṣərayim bəyāḏ ḥăzāqâ:

27 zəḵōr la‘ăḇāḏeyḵā lə’aḇərâām ləyiṣəḥāq ûləya‘ăqōḇ ’al-tēfen ’el-qəšî hā‘ām hazzeh wə’el-rišə‘wō wə’el-ḥaṭṭā’ṯwō:

28 pen-yō’mərû hā’āreṣ ’ăšer hwōṣē’ṯānû miššām mibəlî yəḵōleṯ yəhwâ lahăḇî’ām ’el-hā’āreṣ ’ăšer-diber lâem ûmiśśinə’āṯwō ’wōṯām hwōṣî’ām lahămiṯām bammiḏəbār:

29 wəhēm ‘amməḵā wənaḥălāṯeḵā ’ăšer hwōṣē’ṯā bəḵōḥăḵā hagāḏōl ûḇizərō‘ăḵā hannəṭûyâ: f


Next: Deuteronomy (Devarim) Chapter 10