Sacred Texts  Bible  Index 
Polyglot  KJV  Sep  Vul 

2 Chronicles (2 Divrey Yamim) Index
  Previous  Next 

Tanach (Hebrew): 2 Chronicles (2 Divrey Yamim) Chapter 26

1 ‏וַיִּקְח֞וּ כָּל־עַ֤ם יְהוּדָה֙ אֶת־עֻזִּיָּ֔הוּ וְה֕וּא בֶּן־שֵׁ֥שׁ עֶשְׂרֵ֖ה שָׁנָ֑ה וַיַּמְלִ֣יכוּ אֹת֔וֹ תַּ֖חַת אָבִ֥יו אֲמַצְיָֽהוּ׃

2 ‏ה֚וּא בָּנָ֣ה אֶת־אֵיל֔וֹת וַיְשִׁיבֶ֖הָ לִֽיהוּדָ֑ה אַחֲרֵ֥י שְׁכַֽב־הַמֶּ֖לֶךְ עִם־אֲבֹתָֽיו׃ פ

3 ‏בֶּן־שֵׁ֨שׁ עֶשְׂרֵ֤ה שָׁנָה֙ עֻזִּיָּ֣הוּ בְמָלְכ֔וֹ וַחֲמִשִּׁ֤ים וּשְׁתַּ֙יִם֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ יכיליה יְכָלְיָ֖ה מִן־יְרוּשָׁלִָֽם׃

4 ‏וַיַּ֥עַשׂ הַיָּשָׁ֖ר בְּעֵינֵ֣י יְהוָ֑ה כְּכֹ֥ל אֲשֶׁר־עָשָׂ֖ה אֲמַצְיָ֥הוּ אָבִֽיו׃

5 ‏וַיְהִי֙ לִדְרֹ֣שׁ אֱלֹהִ֔ים בִּימֵ֣י זְכַרְיָ֔הוּ הַמֵּבִ֖ין בִּרְאֹ֣ת הָאֱלֹהִ֑ים וּבִימֵי֙ דָּרְשׁ֣וֹ אֶת־יְהוָ֔ה הִצְלִיח֖וֹ הָאֱלֹהִֽים׃ ס

6 ‏וַיֵּצֵא֙ וַיִּלָּ֣חֶם בַּפְּלִשְׁתִּ֔ים וַיִּפְרֹ֞ץ אֶת־ח֣וֹמַת גַּ֗ת וְאֵת֙ חוֹמַ֣ת יַבְנֵ֔ה וְאֵ֖ת חוֹמַ֣ת אַשְׁדּ֑וֹד וַיִּבְנֶ֣ה עָרִ֔ים בְּאַשְׁדּ֖וֹד וּבַפְּלִשְׁתִּֽים׃

7 ‏וַיַּעְזְרֵ֨הוּ הָֽאֱלֹהִ֜ים עַל־פְּלִשְׁתִּ֧ים וְעַל־הערביים הָֽעַרְבִ֛ים הַיֹּשְׁבִ֥ים בְּגוּר־בָּ֖עַל וְהַמְּעוּנִֽים׃

8 ‏וַיִּתְּנ֧וּ הָֽעַמּוֹנִ֛ים מִנְחָ֖ה לְעֻזִּיָּ֑הוּ וַיֵּ֤לֶךְ שְׁמוֹ֙ עַד־לְב֣וֹא מִצְרַ֔יִם כִּ֥י הֶחֱזִ֖יק עַד־לְמָֽעְלָה׃

9 ‏וַיִּ֨בֶן עֻזִּיָּ֤הוּ מִגְדָּלִים֙ בִּיר֣וּשָׁלִַ֔ם עַל־שַׁ֧עַר הַפִּנָּ֛ה וְעַל־שַׁ֥עַר הַגַּ֖יְא וְעַל־הַמִּקְצ֑וֹעַ וַֽיְחַזְּקֵֽם׃

10 ‏וַיִּ֨בֶן מִגְדָּלִ֜ים בַּמִּדְבָּ֗ר וַיַּחְצֹב֙ בֹּר֣וֹת רַבִּ֔ים כִּ֤י מִקְנֶה־רַּב֙ הָ֣יָה ל֔וֹ וּבַשְּׁפֵלָ֖ה וּבַמִּישׁ֑וֹר אִכָּרִ֣ים וְכֹֽרְמִ֗ים בֶּהָרִים֙ וּבַכַּרְמֶ֔ל כִּֽי־אֹהֵ֥ב אֲדָמָ֖ה הָיָֽה׃ ס

11 ‏וַיְהִ֣י לְעֻזִּיָּ֡הוּ חַיִל֩ עֹשֵׂ֨ה מִלְחָמָ֜ה יוֹצְאֵ֧י צָבָ֣א לִגְד֗וּד בְּמִסְפַּר֙ פְּקֻדָּתָ֔ם בְּיַד֙ יעואל יְעִיאֵ֣ל הַסּוֹפֵ֔ר וּמַעֲשֵׂיָ֖הוּ הַשּׁוֹטֵ֑ר עַ֚ל יַד־חֲנַנְיָ֔הוּ מִשָּׂרֵ֖י הַמֶּֽלֶךְ׃

12 ‏כֹּ֠ל מִסְפַּ֞ר רָאשֵׁ֤י הָאָבוֹת֙ לְגִבּ֣וֹרֵי חָ֔יִל אַלְפַּ֖יִם וְשֵׁ֥שׁ מֵאֽוֹת׃

13 ‏וְעַל־יָדָם֩ חֵ֨יל צָבָ֜א שְׁלֹ֧שׁ מֵא֣וֹת אֶ֗לֶף וְשִׁבְעַ֤ת אֲלָפִים֙ וַחֲמֵ֣שׁ מֵא֔וֹת עוֹשֵׂ֥י מִלְחָמָ֖ה בְּכֹ֣חַ חָ֑יִל לַעְזֹ֥ר לַמֶּ֖לֶךְ עַל־הָאוֹיֵֽב׃

14 ‏וַיָּכֶן֩ לָהֶ֨ם עֻזִּיָּ֜הוּ לְכָל־הַצָּבָ֗א מָגִנִּ֤ים וּרְמָחִים֙ וְכ֣וֹבָעִ֔ים וְשִׁרְיֹנ֖וֹת וּקְשָׁת֑וֹת וּלְאַבְנֵ֖י קְלָעִֽים׃

15 ‏וַיַּ֣עַשׂ׀ בִּירוּשָׁלִַ֨ם חִשְּׁבֹנ֜וֹת מַחֲשֶׁ֣בֶת חוֹשֵׁ֗ב לִהְי֤וֹת עַל־הַמִּגְדָּלִים֙ וְעַל־הַפִּנּ֔וֹת לִירוֹא֙ בַּֽחִצִּ֔ים וּבָאֲבָנִ֖ים גְּדֹל֑וֹת וַיֵּצֵ֤א שְׁמוֹ֙ עַד־לְמֵ֣רָח֔וֹק כִּֽי־הִפְלִ֥יא לְהֵעָזֵ֖ר עַ֥ד כִּֽי־חָזָֽק׃

16 ‏וּכְחֶזְקָת֗וֹ גָּבַ֤הּ לִבּוֹ֙ עַד־לְהַשְׁחִ֔ית וַיִּמְעַ֖ל בַּיהוָ֣ה אֱלֹהָ֑יו וַיָּבֹא֙ אֶל־הֵיכַ֣ל יְהוָ֔ה לְהַקְטִ֖יר עַל־מִזְבַּ֥ח הַקְּטֹֽרֶת׃

17 ‏וַיָּבֹ֥א אַחֲרָ֖יו עֲזַרְיָ֣הוּ הַכֹּהֵ֑ן וְעִמּ֞וֹ כֹּהֲנִ֧ים׀ לַיהוָ֛ה שְׁמוֹנִ֖ים בְּנֵי־חָֽיִל׃

18 ‏וַיַּעַמְד֞וּ עַל־עֻזִּיָּ֣הוּ הַמֶּ֗לֶךְ וַיֹּ֤אמְרוּ לוֹ֙ לֹא־לְךָ֣ עֻזִּיָּ֗הוּ לְהַקְטִיר֙ לַֽיהוָ֔ה כִּ֣י לַכֹּהֲנִ֧ים בְּנֵי־אַהֲרֹ֛ן הַמְקֻדָּשִׁ֖ים לְהַקְטִ֑יר צֵ֤א מִן־הַמִּקְדָּשׁ֙ כִּ֣י מָעַ֔לְתָּ וְלֹֽא־לְךָ֥ לְכָב֖וֹד מֵיְהוָ֥ה אֱלֹהִֽים׃

19 ‏וַיִּזְעַף֙ עֻזִּיָּ֔הוּ וּבְיָד֥וֹ מִקְטֶ֖רֶת לְהַקְטִ֑יר וּבְזַעְפּ֣וֹ עִם־הַכֹּהֲנִ֗ים וְ֠הַצָּרַעַת זָרְחָ֨ה בְמִצְח֜וֹ לִפְנֵ֤י הַכֹּֽהֲנִים֙ בְּבֵ֣ית יְהוָ֔ה מֵעַ֖ל לְמִזְבַּ֥ח הַקְּטֹֽרֶת׃

20 ‏וַיִּ֣פֶן אֵלָ֡יו עֲזַרְיָהוּ֩ כֹהֵ֨ן הָרֹ֜אשׁ וְכָל־הַכֹּהֲנִ֗ים וְהִנֵּה־ה֤וּא מְצֹרָע֙ בְּמִצְח֔וֹ וַיַּבְהִל֖וּהוּ מִשָּׁ֑ם וְגַם־הוּא֙ נִדְחַ֣ף לָצֵ֔את כִּ֥י נִגְּע֖וֹ יְהוָֽה׃

21 ‏וַיְהִי֩ עֻזִּיָּ֨הוּ הַמֶּ֜לֶךְ מְצֹרָ֣ע׀ עַד־י֣וֹם מוֹת֗וֹ וַיֵּ֜שֶׁב בֵּ֤ית החפשות הַֽחָפְשִׁית֙ מְצֹרָ֔ע כִּ֥י נִגְזַ֖ר מִבֵּ֣ית יְהוָ֑ה וְיוֹתָ֤ם בְּנוֹ֙ עַל־בֵּ֣ית הַמֶּ֔לֶךְ שׁוֹפֵ֖ט אֶת־עַ֥ם הָאָֽרֶץ׃

22 ‏וְיֶ֙תֶר֙ דִּבְרֵ֣י עֻזִּיָּ֔הוּ הָרִאשֹׁנִ֖ים וְהָאֲחֲרֹנִ֑ים1 כָּתַ֛ב יְשַֽׁעְיָ֥הוּ בֶן־אָמ֖וֹץ הַנָּבִֽיא׃

23 ‏וַיִּשְׁכַּ֨ב עֻזִּיָּ֜הוּ עִם־אֲבֹתָ֗יו וַיִּקְבְּר֨וּ אֹת֤וֹ עִם־אֲבֹתָיו֙ בִּשְׂדֵ֤ה הַקְּבוּרָה֙ אֲשֶׁ֣ר לַמְּלָכִ֔ים כִּ֥י אָמְר֖וּ מְצוֹרָ֣ע ה֑וּא וַיִּמְלֹ֛ךְ יוֹתָ֥ם בְּנ֖וֹ תַּחְתָּֽיו׃ פ

1 wayyiqəḥû kāl-‘am yəhûḏâ ’eṯ-‘uzzîyâû wəhû’ ben-šēš ‘eśərēh šānâ wayyaməlîḵû ’ōṯwō taḥaṯ ’āḇîw ’ămaṣəyâû:

2 hû’ bānâ ’eṯ-’êlwōṯ wayəšîḇehā lîhûḏâ ’aḥărê šəḵaḇ-hammeleḵə ‘im-’ăḇōṯāyw: f

3 ben-šēš ‘eśərēh šānâ ‘uzzîyâû ḇəmāləḵwō waḥămiššîm ûšətayim šānâ mālaḵə bîrûšālāim wəšēm ’immwō yəḵîləyâ yəḵāləyâ min-yərûšālāim:

4 wayya‘aś hayyāšār bə‘ênê yəhwâ kəḵōl ’ăšer-‘āśâ ’ămaṣəyâû ’āḇîw:

5 wayəhî liḏərōš ’ĕlōhîm bîmê zəḵarəyâû hammēḇîn birə’ōṯ hā’ĕlōhîm ûḇîmê dārəšwō ’eṯ-yəhwâ hiṣəlîḥwō hā’ĕlōhîm: s

6 wayyēṣē’ wayyillāḥem bapəlišətîm wayyifərōṣ ’eṯ-ḥwōmaṯ gaṯ wə’ēṯ ḥwōmaṯ yaḇənēh wə’ēṯ ḥwōmaṯ ’ašədwōḏ wayyiḇəneh ‘ārîm bə’ašədwōḏ ûḇapəlišətîm:

7 wayya‘əzərēhû hā’ĕlōhîm ‘al-pəlišətîm wə‘al-hā‘arəḇîyîm hā‘arəḇîm hayyōšəḇîm bəḡûr-bā‘al wəhammə‘ûnîm:

8 wayyitənû hā‘ammwōnîm minəḥâ lə‘uzzîyâû wayyēleḵə šəmwō ‘aḏ-ləḇwō’ miṣərayim kî heḥĕzîq ‘aḏ-ləmā‘əlâ:

9 wayyiḇen ‘uzzîyâû miḡədālîm bîrûšālaim ‘al-ša‘ar hapinnâ wə‘al-ša‘ar hagayə’ wə‘al-hammiqəṣwō‘a wayəḥazzəqēm:

10 wayyiḇen miḡədālîm bammiḏəbār wayyaḥəṣōḇ bōrwōṯ rabîm kî miqəneh-rraḇ hāyâ lwō ûḇaššəfēlâ ûḇammîšwōr ’ikārîm wəḵōrəmîm behārîm ûḇakarəmel kî-’ōhēḇ ’ăḏāmâ hāyâ: s

11 wayəhî lə‘uzzîyâû ḥayil ‘ōśēh miləḥāmâ ywōṣə’ê ṣāḇā’ liḡəḏûḏ bəmisəpar pəqudāṯām bəyaḏ yə‘û’ēl yə‘î’ēl hasswōfēr ûma‘ăśêâû haššwōṭēr ‘al yaḏ-ḥănanəyâû miśśārê hammeleḵə:

12 kōl misəpar rā’šê hā’āḇwōṯ ləḡibwōrê ḥāyil ’aləpayim wəšēš mē’wōṯ:

13 wə‘al-yāḏām ḥêl ṣāḇā’ šəlōš mē’wōṯ ’elef wəšiḇə‘aṯ ’ălāfîm waḥămēš mē’wōṯ ‘wōśê miləḥāmâ bəḵōḥa ḥāyil la‘əzōr lammeleḵə ‘al-hā’wōyēḇ:

14 wayyāḵen lâem ‘uzzîyâû ləḵāl-haṣṣāḇā’ māḡinnîm ûrəmāḥîm wəḵwōḇā‘îm wəširəyōnwōṯ ûqəšāṯwōṯ ûlə’aḇənê qəlā‘îm:

15 wayya‘aś| bîrûšālaim ḥiššəḇōnwōṯ maḥăšeḇeṯ ḥwōšēḇ lihəywōṯ ‘al-hammiḡədālîm wə‘al-hapinnwōṯ lîrwō’ baḥiṣṣîm ûḇā’ăḇānîm gəḏōlwōṯ wayyēṣē’ šəmwō ‘aḏ-ləmērāḥwōq kî-hifəlî’ ləhē‘āzēr ‘aḏ kî-ḥāzāq:

16 ûḵəḥezəqāṯwō gāḇah libwō ‘aḏ-ləhašəḥîṯ wayyimə‘al bayhwâ ’ĕlōhāyw wayyāḇō’ ’el-hêḵal yəhwâ ləhaqəṭîr ‘al-mizəbaḥ haqqəṭōreṯ:

17 wayyāḇō’ ’aḥărāyw ‘ăzarəyâû hakōhēn wə‘immwō kōhănîm| layhwâ šəmwōnîm bənê-ḥāyil:

18 wayya‘aməḏû ‘al-‘uzzîyâû hammeleḵə wayyō’mərû lwō lō’-ləḵā ‘uzzîyâû ləhaqəṭîr layhwâ kî lakōhănîm bənê-’ahărōn haməqudāšîm ləhaqəṭîr ṣē’ min-hammiqədāš kî mā‘alətā wəlō’-ləḵā ləḵāḇwōḏ mêəhwâ ’ĕlōhîm:

19 wayyizə‘af ‘uzzîyâû ûḇəyāḏwō miqəṭereṯ ləhaqəṭîr ûḇəza‘əpwō ‘im-hakōhănîm wəhaṣṣāra‘aṯ zārəḥâ ḇəmiṣəḥwō lifənê hakōhănîm bəḇêṯ yəhwâ mē‘al ləmizəbaḥ haqqəṭōreṯ:

20 wayyifen ’ēlāyw ‘ăzarəyâû ḵōhēn hārō’š wəḵāl-hakōhănîm wəhinnēh-hû’ məṣōrā‘ bəmiṣəḥwō wayyaḇəhilûhû miššām wəḡam-hû’ niḏəḥaf lāṣē’ṯ kî nigə‘wō yəhwâ:

21 wayəhî ‘uzzîyâû hammeleḵə məṣōrā‘| ‘aḏ-ywōm mwōṯwō wayyēšeḇ bêṯ haḥāfəšûṯ haḥāfəšîṯ məṣōrā‘ kî niḡəzar mibêṯ yəhwâ wəywōṯām bənwō ‘al-bêṯ hammeleḵə šwōfēṭ ’eṯ-‘am hā’āreṣ:

22 wəyeṯer diḇərê ‘uzzîyâû hāri’šōnîm wəhā’ăḥărōnîm1 kāṯaḇ yəša‘əyâû ḇen-’āmwōṣ hannāḇî’:

23 wayyišəkaḇ ‘uzzîyâû ‘im-’ăḇōṯāyw wayyiqəbərû ’ōṯwō ‘im-’ăḇōṯāyw biśəḏēh haqqəḇûrâ ’ăšer lamməlāḵîm kî ’āmərû məṣwōrā‘ hû’ wayyiməlōḵə ywōṯām bənwō taḥətāyw: f


Next: 2 Chronicles (2 Divrey Yamim) Chapter 27