Sacred Texts  Bible  Index 
Polyglot  KJV  Sep  Vul 

1 Chronicles (1 Divrey Yamim) Index
  Previous  Next 

Tanach (Hebrew): 1 Chronicles (1 Divrey Yamim) Chapter 23

1 ‏וְדָוִ֥יד זָקֵ֖ן וְשָׂבַ֣ע יָמִ֑ים וַיַּמְלֵ֛ךְ אֶת־שְׁלֹמֹ֥ה בְנ֖וֹ עַל־יִשְׂרָאֵֽל׃

2 ‏וַיֶּאֱסֹף֙ אֶת־כָּל־שָׂרֵ֣י יִשְׂרָאֵ֔ל וְהַכֹּהֲנִ֖ים וְהַלְוִיִּֽם׃

3 ‏וַיִּסָּֽפְרוּ֙ הַלְוִיִּ֔ם מִבֶּ֛ן שְׁלֹשִׁ֥ים שָׁנָ֖ה וָמָ֑עְלָה וַיְהִ֨י מִסְפָּרָ֤ם לְגֻלְגְּלֹתָם֙ לִגְבָרִ֔ים שְׁלֹשִׁ֥ים וּשְׁמוֹנָ֖ה אָֽלֶף׃

4 ‏מֵאֵ֗לֶּה לְנַצֵּ֙חַ֙ עַל־מְלֶ֣אכֶת בֵּית־יְהוָ֔ה עֶשְׂרִ֥ים וְאַרְבָּעָ֖ה אָ֑לֶף וְשֹׁטְרִ֥ים וְשֹׁפְטִ֖ים שֵׁ֥שֶׁת אֲלָפִֽים׃

5 ‏וְאַרְבַּ֥עַת אֲלָפִ֖ים שֹׁעֲרִ֑ים וְאַרְבַּ֤עַת אֲלָפִים֙ מְהַֽלְלִ֣ים לַיהוָ֔ה בַּכֵּלִ֕ים אֲשֶׁ֥ר עָשִׂ֖יתִי לְהַלֵּֽל׃

6 ‏וַיֶּֽחָלְקֵ֥ם דָּוִ֖יד מַחְלְק֑וֹת סלִבְנֵ֣י לֵוִ֔י לְגֵרְשׁ֖וֹן קְהָ֥ת וּמְרָרִֽי׃ ס

7 ‏לַגֵּרְשֻׁנִּ֖י לַעְדָּ֥ן וְשִׁמְעִֽי׃ ס

8 ‏בְּנֵ֣י לַעְדָּ֗ן הָרֹ֧אשׁ יְחִיאֵ֛ל וְזֵתָ֥ם וְיוֹאֵ֖ל שְׁלֹשָֽׁה׃ ס

9 ‏בְּנֵ֣י שִׁמְעִ֗י שלמות שְׁלוֹמִ֧ית וַחֲזִיאֵ֛ל וְהָרָ֖ן שְׁלֹשָׁ֑ה אֵ֛לֶּה רָאשֵׁ֥י הָאָב֖וֹת לְלַעְדָּֽן׃ ס

10 ‏וּבְנֵ֣י שִׁמְעִ֔י יַ֣חַת זִינָ֔א וִיע֖וּשׁ וּבְרִיעָ֑ה אֵ֥לֶּה בְנֵי־שִׁמְעִ֖י אַרְבָּעָֽה׃

11 ‏וַֽיְהִי־יַ֣חַת הָרֹ֔אשׁ וְזִיזָ֖ה הַשֵּׁנִ֑י וִיע֤וּשׁ וּבְרִיעָה֙ לֹֽא־הִרְבּ֣וּ בָנִ֔ים וַיִּֽהְיוּ֙ לְבֵ֣ית אָ֔ב לִפְקֻדָּ֖ה אֶחָֽת׃ ס

12 ‏בְּנֵ֣י קְהָ֗ת עַמְרָ֥ם יִצְהָ֛ר חֶבְר֥וֹן וְעֻזִּיאֵ֖ל אַרְבָּעָֽה׃ ס

13 ‏בְּנֵ֥י עַמְרָ֖ם אַהֲרֹ֣ן וּמֹשֶׁ֑ה וַיִּבָּדֵ֣ל אַהֲרֹ֡ן לְֽהַקְדִּישׁוֹ֩ קֹ֨דֶשׁ קָֽדָשִׁ֤ים הֽוּא־וּבָנָיו֙ עַד־עוֹלָ֔ם לְהַקְטִיר֩ לִפְנֵ֨י יְהוָ֧ה לְשָׁרְת֛וֹ וּלְבָרֵ֥ךְ בִּשְׁמ֖וֹ עַד־עוֹלָֽם׃

14 ‏וּמֹשֶׁ֖ה אִ֣ישׁ הָאֱלֹהִ֑ים בָּנָ֕יו יִקָּרְא֖וּ עַל־שֵׁ֥בֶט הַלֵּוִֽי׃

15 ‏בְּנֵ֣י מֹשֶׁ֔ה גֵּרְשֹׁ֖ם וֶאֱלִיעֶֽזֶר׃

16 ‏בְּנֵ֥י גֵרְשׁ֖וֹם שְׁבוּאֵ֥ל הָרֹֽאשׁ׃

17 ‏וַיִּֽהְי֥וּ בְנֵי־אֱלִיעֶ֖זֶר רְחַבְיָ֣ה הָרֹ֑אשׁ וְלֹא־הָיָ֤ה לֶאֱלִיעֶ֙זֶר֙ בָּנִ֣ים אֲחֵרִ֔ים וּבְנֵ֥י רְחַבְיָ֖ה רָב֥וּ לְמָֽעְלָה׃

18 ‏בְּנֵ֥י יִצְהָ֖ר שְׁלֹמִ֥ית הָרֹֽאשׁ׃ ס

19 ‏בְּנֵ֖י חֶבְר֑וֹן יְרִיָּ֤הוּ הָרֹאשׁ֙ אֲמַרְיָ֣ה הַשֵּׁנִ֔י יַחֲזִיאֵל֙ הַשְּׁלִישִׁ֔י וִֽיקַמְעָ֖ם הָרְבִיעִֽי׃

20 ‏בְּנֵ֖י עֻזִּיאֵ֑ל מִיכָ֣ה הָרֹ֔אשׁ וְיִשִּׁיָּ֖ה הַשֵּׁנִֽי׃ ס

21 ‏בְּנֵ֤י מְרָרִי֙ מַחְלִ֣י וּמוּשִׁ֔י בְּנֵ֥י מַחְלִ֖י אֶלְעָזָ֥ר וְקִֽישׁ׃

22 ‏וַיָּ֙מָת֙ אֶלְעָזָ֔ר וְלֹא־הָ֥יוּ ל֛וֹ בָּנִ֖ים כִּ֣י אִם־בָּנ֑וֹת וַיִּשָּׂא֥וּם בְּנֵי־קִ֖ישׁ אֲחֵיהֶֽם׃

23 ‏בְּנֵ֣י מוּשִׁ֗י מַחְלִ֥י וְעֵ֛דֶר וִירֵמ֖וֹת שְׁלֹשָֽׁה׃

24 ‏אֵ֣לֶּה בְנֵֽי־לֵוִי֩ לְבֵ֨ית אֲבֹתֵיהֶ֜ם רָאשֵׁ֧י הָאָב֣וֹת לִפְקוּדֵיהֶ֗ם בְּמִסְפַּ֤ר שֵׁמוֹת֙ לְגֻלְגְּלֹתָ֔ם עֹשֵׂה֙ הַמְּלָאכָ֔ה לַעֲבֹדַ֖ת בֵּ֣ית יְהוָ֑ה מִבֶּ֛ן עֶשְׂרִ֥ים שָׁנָ֖ה וָמָֽעְלָה׃

25 ‏כִּ֚י אָמַ֣ר דָּוִ֔יד הֵנִ֛יחַ יְהוָ֥ה אֱלֹהֵֽי־יִשְׂרָאֵ֖ל לְעַמּ֑וֹ וַיִּשְׁכֹּ֥ן בִּירוּשָׁלִַ֖ם עַד־לְעוֹלָֽם׃

26 ‏וְגַ֖ם לַלְוִיִּ֑ם אֵין־לָשֵׂ֧את אֶת־הַמִּשְׁכָּ֛ן וְאֶת־כָּל־כֵּלָ֖יו לַעֲבֹדָתֽוֹ׃

27 ‏כִּ֣י בְדִבְרֵ֤י דָוִיד֙ הָאַ֣חֲרֹנִ֔ים הֵ֖מָּה מִסְפַּ֣ר בְּנֵי־לֵוִ֑י מִבֶּ֛ן עֶשְׂרִ֥ים שָׁנָ֖ה וּלְמָֽעְלָה׃

28 ‏כִּ֣י מַעֲמָדָ֞ם לְיַד־בְּנֵ֣י אַהֲרֹ֗ן לַעֲבֹדַת֙ בֵּ֣ית יְהוָ֔ה עַל־הַחֲצֵרוֹת֙ וְעַל־הַלְּשָׁכ֔וֹת וְעַֽל־טָהֳרַ֖ת לְכָל־קֹ֑דֶשׁ וּמַֽעֲשֵׂ֔ה עֲבֹדַ֖ת בֵּ֥ית הָאֱלֹהִֽים׃

29 ‏וּלְלֶ֨חֶם הַֽמַּעֲרֶ֜כֶת וּלְסֹ֤לֶת לְמִנְחָה֙ וְלִרְקִיקֵ֣י הַמַּצּ֔וֹת וְלַֽמַּחֲבַ֖ת וְלַמֻּרְבָּ֑כֶת וּלְכָל־מְשׂוּרָ֖ה וּמִדָּֽה׃

30 ‏וְלַעֲמֹד֙ בַּבֹּ֣קֶר בַּבֹּ֔קֶר לְהֹד֥וֹת וּלְהַלֵּ֖ל לַיהוָ֑ה וְכֵ֖ן לָעָֽרֶב׃

31 ‏וּלְכֹ֨ל הַעֲל֤וֹת עֹלוֹת֙ לַיהוָ֔ה לַשַּׁבָּת֔וֹת לֶחֳדָשִׁ֖ים וְלַמֹּעֲדִ֑ים בְּמִסְפָּ֨ר כְּמִשְׁפָּ֧ט עֲלֵיהֶ֛ם תָּמִ֖יד לִפְנֵ֥י יְהוָֽה׃

32 ‏וְשָׁמְר֞וּ אֶת־מִשְׁמֶ֣רֶת אֹֽהֶל־מוֹעֵ֗ד וְאֵת֙ מִשְׁמֶ֣רֶת הַקֹּ֔דֶשׁ וּמִשְׁמֶ֕רֶת בְּנֵ֥י אַהֲרֹ֖ן אֲחֵיהֶ֑ם לַעֲבֹדַ֖ת בֵּ֥ית יְהוָֽה׃ פ

1 wəḏāwîḏ zāqēn wəśāḇa‘ yāmîm wayyaməlēḵə ’eṯ-šəlōmōh ḇənwō ‘al-yiśərā’ēl:

2 wayye’ĕsōf ’eṯ-kāl-śārê yiśərā’ēl wəhakōhănîm wəhaləwîyim:

3 wayyissāfərû haləwîyim miben šəlōšîm šānâ wāmā‘əlâ wayəhî misəpārām ləḡuləgəlōṯām liḡəḇārîm šəlōšîm ûšəmwōnâ ’ālef:

4 mē’ēlleh lənaṣṣēḥa ‘al-məle’ḵeṯ bêṯ-yəhwâ ‘eśərîm wə’arəbā‘â ’ālef wəšōṭərîm wəšōfəṭîm šēšeṯ ’ălāfîm:

5 wə’arəba‘aṯ ’ălāfîm šō‘ărîm wə’arəba‘aṯ ’ălāfîm məhaləlîm layhwâ bakēlîm ’ăšer ‘āśîṯî ləhallēl:

6 wayyeḥāləqēm dāwîḏ maḥələqwōṯ sliḇənê lēwî ləḡērəšwōn qəhāṯ ûmərārî: s

7 lagērəšunnî la‘ədān wəšimə‘î: s

8 bənê la‘ədān hārō’š yəḥî’ēl wəzēṯām wəywō’ēl šəlōšâ: s

9 bənê šimə‘î šəlōmwōṯ šəlwōmîṯ waḥăzî’ēl wəhārān šəlōšâ ’ēlleh rā’šê hā’āḇwōṯ ləla‘ədān: s

10 ûḇənê šimə‘î yaḥaṯ zînā’ wî‘ûš ûḇərî‘â ’ēlleh ḇənê-šimə‘î ’arəbā‘â:

11 wayəhî-yaḥaṯ hārō’š wəzîzâ haššēnî wî‘ûš ûḇərî‘â lō’-hirəbû ḇānîm wayyihəyû ləḇêṯ ’āḇ lifəqudâ ’eḥāṯ: s

12 bənê qəhāṯ ‘amərām yiṣəhār ḥeḇərwōn wə‘uzzî’ēl ’arəbā‘â: s

13 bənê ‘amərām ’ahărōn ûmōšeh wayyibāḏēl ’ahărōn ləhaqədîšwō qōḏeš qāḏāšîm hû’-ûḇānāyw ‘aḏ-‘wōlām ləhaqəṭîr lifənê yəhwâ ləšārəṯwō ûləḇārēḵə bišəmwō ‘aḏ-‘wōlām:

14 ûmōšeh ’îš hā’ĕlōhîm bānāyw yiqqārə’û ‘al-šēḇeṭ hallēwî:

15 bənê mōšeh gērəšōm we’ĕlî‘ezer:

16 bənê ḡērəšwōm šəḇû’ēl hārō’š:

17 wayyihəyû ḇənê-’ĕlî‘ezer rəḥaḇəyâ hārō’š wəlō’-hāyâ le’ĕlî‘ezer bānîm ’ăḥērîm ûḇənê rəḥaḇəyâ rāḇû ləmā‘əlâ:

18 bənê yiṣəhār šəlōmîṯ hārō’š: s

19 bənê ḥeḇərwōn yərîyâû hārō’š ’ămarəyâ haššēnî yaḥăzî’ēl haššəlîšî wîqamə‘ām hārəḇî‘î:

20 bənê ‘uzzî’ēl mîḵâ hārō’š wəyiššîyâ haššēnî: s

21 bənê mərārî maḥəlî ûmûšî bənê maḥəlî ’elə‘āzār wəqîš:

22 wayyāmāṯ ’elə‘āzār wəlō’-hāyû lwō bānîm kî ’im-bānwōṯ wayyiśśā’ûm bənê-qîš ’ăḥêhem:

23 bənê mûšî maḥəlî wə‘ēḏer wîrēmwōṯ šəlōšâ:

24 ’ēlleh ḇənê-lēwî ləḇêṯ ’ăḇōṯêhem rā’šê hā’āḇwōṯ lifəqûḏêhem bəmisəpar šēmwōṯ ləḡuləgəlōṯām ‘ōśēh hamməlā’ḵâ la‘ăḇōḏaṯ bêṯ yəhwâ miben ‘eśərîm šānâ wāmā‘əlâ:

25 kî ’āmar dāwîḏ hēnîḥa yəhwâ ’ĕlōhê-yiśərā’ēl lə‘ammwō wayyišəkōn bîrûšālaim ‘aḏ-lə‘wōlām:

26 wəḡam laləwîyim ’ên-lāśē’ṯ ’eṯ-hammišəkān wə’eṯ-kāl-kēlāyw la‘ăḇōḏāṯwō:

27 kî ḇəḏiḇərê ḏāwîḏ hā’aḥărōnîm hēmmâ misəpar bənê-lēwî miben ‘eśərîm šānâ ûləmā‘əlâ:

28 kî ma‘ămāḏām ləyaḏ-bənê ’ahărōn la‘ăḇōḏaṯ bêṯ yəhwâ ‘al-haḥăṣērwōṯ wə‘al-halləšāḵwōṯ wə‘al-ṭâŏraṯ ləḵāl-qōḏeš ûma‘ăśēh ‘ăḇōḏaṯ bêṯ hā’ĕlōhîm:

29 ûləleḥem hamma‘ăreḵeṯ ûləsōleṯ ləminəḥâ wəlirəqîqê hammaṣṣwōṯ wəlammaḥăḇaṯ wəlammurəbāḵeṯ ûləḵāl-məśûrâ ûmidâ:

30 wəla‘ămōḏ babōqer babōqer ləhōḏwōṯ ûləhallēl layhwâ wəḵēn lā‘āreḇ:

31 ûləḵōl ha‘ălwōṯ ‘ōlwōṯ layhwâ laššabāṯwōṯ leḥŏḏāšîm wəlammō‘ăḏîm bəmisəpār kəmišəpāṭ ‘ălêhem tāmîḏ lifənê yəhwâ:

32 wəšāmərû ’eṯ-mišəmereṯ ’ōhel-mwō‘ēḏ wə’ēṯ mišəmereṯ haqqōḏeš ûmišəmereṯ bənê ’ahărōn ’ăḥêhem la‘ăḇōḏaṯ bêṯ yəhwâ: f


Next: 1 Chronicles (1 Divrey Yamim) Chapter 24