Sacred Texts  Bible  Index 
Polyglot  KJV  Sep  Vul 

1 Chronicles (1 Divrey Yamim) Index
  Previous  Next 

Tanach (Hebrew): 1 Chronicles (1 Divrey Yamim) Chapter 21

1 ‏וַיַּֽעֲמֹ֥ד שָׂטָ֖ן עַל־יִשְׂרָאֵ֑ל וַיָּ֙סֶת֙ אֶת־דָּוִ֔יד לִמְנ֖וֹת אֶת־יִשְׂרָאֵֽל׃

2 ‏וַיֹּ֨אמֶר דָּוִ֤יד אֶל־יוֹאָב֙ וְאֶל־שָׂרֵ֣י הָעָ֔ם לְכ֗וּ סִפְרוּ֙ אֶת־יִשְׂרָאֵ֔ל מִבְּאֵ֥ר שֶׁ֖בַע וְעַד־דָּ֑ן וְהָבִ֣יאוּ אֵלַ֔י וְאֵדְעָ֖ה אֶת־מִסְפָּרָֽם׃

3 ‏וַיֹּ֣אמֶר יוֹאָ֗ב יוֹסֵף֩ יְהוָ֨ה עַל־עַמּ֤וֹ׀ כָּהֵם֙ מֵאָ֣ה פְעָמִ֔ים הֲלֹא֙ אֲדֹנִ֣י הַמֶּ֔לֶךְ כֻּלָּ֥ם לַאדֹנִ֖י לַעֲבָדִ֑ים לָ֣מָּה יְבַקֵּ֥שׁ זֹאת֙ אֲדֹנִ֔י לָ֛מָּה יִהְיֶ֥ה לְאַשְׁמָ֖ה לְיִשְׂרָאֵֽל׃

4 ‏וּדְבַר־הַמֶּ֖לֶךְ חָזַ֣ק עַל־יוֹאָ֑ב וַיֵּצֵ֣א יוֹאָ֗ב וַיִּתְהַלֵּךְ֙ בְּכָל־יִשְׂרָאֵ֔ל וַיָּבֹ֖א יְרוּשָׁלִָֽם׃

5 ‏וַיִּתֵּ֥ן יוֹאָ֛ב אֶת־מִסְפַּ֥ר מִפְקַד־הָעָ֖ם אֶל־דָּוִ֑יד וַיְהִ֣י כָֽל־יִשְׂרָאֵ֡ל אֶ֣לֶף אֲלָפִים֩ וּמֵאָ֨ה אֶ֤לֶף אִישׁ֙ שֹׁ֣לֵֽף חֶ֔רֶב וִֽיהוּדָ֕ה אַרְבַּע֩ מֵא֨וֹת וְשִׁבְעִ֥ים אֶ֛לֶף אִ֖ישׁ שֹׁ֥לֵֽף חָֽרֶב׃

6 ‏וְלֵוִי֙ וּבִנְיָמִ֔ן לֹ֥א פָקַ֖ד בְּתוֹכָ֑ם כִּֽי־נִתְעַ֥ב דְּבַר־הַמֶּ֖לֶךְ אֶת־יוֹאָֽב׃

7 ‏וַיֵּ֙רַע֙ בְּעֵינֵ֣י הָאֱלֹהִ֔ים עַל־הַדָּבָ֖ר הַזֶּ֑ה וַיַּ֖ךְ אֶת־יִשְׂרָאֵֽל׃ פ

8 ‏וַיֹּ֤אמֶר דָּוִיד֙ אֶל־הָ֣אֱלֹהִ֔ים חָטָ֣אתִֽי מְאֹ֔ד אֲשֶׁ֥ר עָשִׂ֖יתִי אֶת־הַדָּבָ֣ר הַזֶּ֑ה וְעַתָּ֗ה הַֽעֲבֶר־נָא֙ אֶת־עֲו֣וֹן עַבְדְּךָ֔ כִּ֥י נִסְכַּ֖לְתִּי מְאֹֽד׃ פ

9 ‏וַיְדַבֵּ֤ר יְהוָה֙ אֶל־גָּ֔ד חֹזֵ֥ה דָוִ֖יד לֵאמֹֽר׃

10 ‏לֵךְ֩ וְדִבַּרְתָּ֨ אֶל־דָּוִ֜יד לֵאמֹ֗ר כֹּ֚ה אָמַ֣ר יְהוָ֔ה שָׁל֕וֹשׁ אֲנִ֖י נֹטֶ֣ה עָלֶ֑יךָ בְּחַר־לְךָ֛ אַחַ֥ת מֵהֵ֖נָּה וְאֶֽעֱשֶׂה־לָּֽךְ׃

11 ‏וַיָּ֥בֹא גָ֖ד אֶל־דָּוִ֑יד וַיֹּ֥אמֶר ל֛וֹ כֹּֽה־אָמַ֥ר יְהוָ֖ה קַבֶּל־לָֽךְ׃

12 ‏אִם־שָׁל֨וֹשׁ שָׁנִ֜ים רָעָ֗ב וְאִם־שְׁלֹשָׁ֨ה חֳדָשִׁ֜ים נִסְפֶּ֥ה מִפְּנֵי־צָרֶיךָ֮ וְחֶ֣רֶב אוֹיְבֶ֣ךָ׀ לְמַשֶּׂגֶת֒ וְאִם־שְׁלֹ֣שֶׁת יָ֠מִים חֶ֣רֶב יְהוָ֤ה וְדֶ֙בֶר֙ בָּאָ֔רֶץ וּמַלְאַ֣ךְ יְהוָ֔ה מַשְׁחִ֖ית בְּכָל־גְּב֣וּל יִשְׂרָאֵ֑ל וְעַתָּ֣ה רְאֵ֔ה מָֽה־אָשִׁ֥יב אֶת־שֹׁלְחִ֖י דָּבָֽר׃ פ

13 ‏וַיֹּ֧אמֶר דָּוִ֛יד אֶל־גָּ֖ד צַר־לִ֣י מְאֹ֑ד אֶפְּלָה־נָּ֣א בְיַד־יְהוָ֗ה כִּֽי־רַבִּ֤ים רַחֲמָיו֙ מְאֹ֔ד וּבְיַד־אָדָ֖ם אַל־אֶפֹּֽל׃

14 ‏וַיִּתֵּ֧ן יְהוָ֛ה דֶּ֖בֶר בְּיִשְׂרָאֵ֑ל וַיִּפֹּל֙ מִיִּשְׂרָאֵ֔ל שִׁבְעִ֥ים אֶ֖לֶף אִֽישׁ׃

15 ‏וַיִּשְׁלַח֩ הָאֱלֹהִ֨ים׀ מַלְאָ֥ךְ׀ לִֽירוּשָׁלִַם֮ לְהַשְׁחִיתָהּ֒ וּכְהַשְׁחִ֗ית רָאָ֤ה יְהוָה֙ וַיִּנָּ֣חֶם עַל־הָֽרָעָ֔ה וַיֹּ֨אמֶר לַמַּלְאָ֤ךְ הַמַּשְׁחִית֙ רַ֔ב עַתָּ֖ה הֶ֣רֶף יָדֶ֑ךָ וּמַלְאַ֤ךְ יְהוָה֙ עֹמֵ֔ד עִם־גֹּ֖רֶן אָרְנָ֥ן הַיְבוּסִֽי׃ ס

16 ‏וַיִּשָּׂ֨א דָוִ֜יד אֶת־עֵינָ֗יו וַיַּ֞רְא אֶת־מַלְאַ֤ךְ יְהוָה֙ עֹמֵ֗ד בֵּ֤ין הָאָ֙רֶץ֙ וּבֵ֣ין הַשָּׁמַ֔יִם וְחַרְבּ֤וֹ שְׁלוּפָה֙ בְּיָד֔וֹ נְטוּיָ֖ה עַל־יְרוּשָׁלִָ֑ם וַיִּפֹּ֨ל דָּוִ֧יד וְהַזְּקֵנִ֛ים מְכֻסִּ֥ים בַּשַּׂקִּ֖ים עַל־פְּנֵיהֶֽם׃

17 ‏וַיֹּ֣אמֶר דָּוִ֣יד אֶֽל־הָאֱלֹהִ֡ים הֲלֹא֩ אֲנִ֨י אָמַ֜רְתִּי לִמְנ֣וֹת בָּעָ֗ם וַאֲנִי־ה֤וּא אֲשֶׁר־חָטָ֙אתִי֙ וְהָרֵ֣עַ הֲרֵע֔וֹתִי וְאֵ֥לֶּה הַצֹּ֖אן מֶ֣ה עָשׂ֑וּ יְהוָ֣ה אֱלֹהַ֗י תְּהִ֨י נָ֤א יָֽדְךָ֙ בִּ֚י וּבְבֵ֣ית אָבִ֔י וּֽבְעַמְּךָ֖ לֹ֥א לְמַגֵּפָֽה׃ ס

18 ‏וּמַלְאַ֧ךְ יְהוָ֛ה אָמַ֥ר אֶל־גָּ֖ד לֵאמֹ֣ר לְדָוִ֑יד כִּ֣י׀ יַעֲלֶ֣ה דָוִ֗יד לְהָקִ֤ים מִזְבֵּ֙חַ֙ לַיהוָ֔ה בְּגֹ֖רֶן אָרְנָ֥ן הַיְבֻסִֽי׃

19 ‏וַיַּ֤עַל דָּוִיד֙ בִּדְבַר־גָּ֔ד אֲשֶׁ֥ר דִּבֶּ֖ר בְּשֵׁ֥ם יְהוָֽה׃

20 ‏וַיָּ֣שָׁב אָרְנָ֗ן וַיַּרְא֙ אֶת־הַמַּלְאָ֔ךְ וְאַרְבַּ֧עַת בָּנָ֛יו עִמּ֖וֹ מִֽתְחַבְּאִ֑ים וְאָרְנָ֖ן דָּ֥שׁ חִטִּֽים׃

21 ‏וַיָּבֹ֥א דָוִ֖יד עַד־אָרְנָ֑ן וַיַּבֵּ֤ט אָרְנָן֙ וַיַּ֣רְא אֶת־דָּוִ֔יד וַיֵּצֵא֙ מִן־הַגֹּ֔רֶן וַיִּשְׁתַּ֧חוּ לְדָוִ֛יד אַפַּ֖יִם אָֽרְצָה׃

22 ‏וַיֹּ֨אמֶר דָּוִ֜יד אֶל־אָרְנָ֗ן תְּנָה־לִּי֙ מְק֣וֹם הַגֹּ֔רֶן וְאֶבְנֶה־בּ֥וֹ מִזְבֵּ֖חַ לַיהוָ֑ה בְּכֶ֤סֶף מָלֵא֙ תְּנֵ֣הוּ לִ֔י וְתֵעָצַ֥ר הַמַּגֵּפָ֖ה מֵעַ֥ל הָעָֽם׃

23 ‏וַיֹּ֨אמֶר אָרְנָ֤ן אֶל־דָּוִיד֙ קַֽח־לָ֔ךְ וְיַ֛עַשׂ אֲדֹנִ֥י הַמֶּ֖לֶךְ הַטּ֣וֹב בְּעֵינָ֑יו רְאֵה֩ נָתַ֨תִּי הַבָּקָ֜ר לָֽעֹל֗וֹת וְהַמּוֹרִגִּ֧ים לָעֵצִ֛ים וְהַחִטִּ֥ים לַמִּנְחָ֖ה הַכֹּ֥ל נָתָֽתִּי׃

24 ‏וַיֹּ֨אמֶר הַמֶּ֤לֶךְ דָּוִיד֙ לְאָרְנָ֔ן לֹ֕א כִּֽי־קָנֹ֥ה אֶקְנֶ֖ה בְּכֶ֣סֶף מָלֵ֑א כִּ֠י לֹא־אֶשָּׂ֤א אֲשֶׁר־לְךָ֙ לַיהוָ֔ה וְהַעֲל֥וֹת עוֹלָ֖ה חִנָּֽם׃

25 ‏וַיִּתֵּ֥ן דָּוִ֛יד לְאָרְנָ֖ן בַּמָּק֑וֹם שִׁקְלֵ֣י זָהָ֔ב מִשְׁקָ֖ל שֵׁ֥שׁ מֵאֽוֹת׃

26 ‏וַיִּבֶן֩ שָׁ֨ם דָּוִ֤יד מִזְבֵּ֙חַ֙ לַיהוָ֔ה וַיַּ֥עַל עֹל֖וֹת וּשְׁלָמִ֑ים וַיִּקְרָא֙ אֶל־יְהוָ֔ה וַיַּֽעֲנֵ֤הוּ בָאֵשׁ֙ מִן־הַשָּׁמַ֔יִם עַ֖ל מִזְבַּ֥ח הָעֹלָֽה׃ פ

27 ‏וַיֹּ֤אמֶר יְהוָה֙ לַמַּלְאָ֔ךְ וַיָּ֥שֶׁב חַרְבּ֖וֹ אֶל־נְדָנָֽהּ׃

28 ‏בָּעֵ֣ת הַהִ֔יא בִּרְא֤וֹת דָּוִיד֙ כִּי־עָנָ֣הוּ יְהוָ֔ה בְּגֹ֖רֶן אָרְנָ֣ן הַיְבוּסִ֑י וַיִּזְבַּ֖ח שָֽׁם׃

29 ‏וּמִשְׁכַּ֣ן יְ֠הוָה אֲשֶׁר־עָשָׂ֨ה מֹשֶׁ֧ה בַמִּדְבָּ֛ר וּמִזְבַּ֥ח הָעוֹלָ֖ה בָּעֵ֣ת הַהִ֑יא בַּבָּמָ֖ה בְּגִבְעֽוֹן׃

30 ‏וְלֹא־יָכֹ֥ל דָּוִ֛יד לָלֶ֥כֶת לְפָנָ֖יו לִדְרֹ֣שׁ אֱלֹהִ֑ים כִּ֣י נִבְעַ֔ת מִפְּנֵ֕י חֶ֖רֶב מַלְאַ֥ךְ יְהוָֽה׃ ס

1 wayya‘ămōḏ śāṭān ‘al-yiśərā’ēl wayyāseṯ ’eṯ-dāwîḏ limənwōṯ ’eṯ-yiśərā’ēl:

2 wayyō’mer dāwîḏ ’el-ywō’āḇ wə’el-śārê hā‘ām ləḵû sifərû ’eṯ-yiśərā’ēl mibə’ēr šeḇa‘ wə‘aḏ-dān wəhāḇî’û ’ēlay wə’ēḏə‘â ’eṯ-misəpārām:

3 wayyō’mer ywō’āḇ ywōsēf yəhwâ ‘al-‘ammwō| kâēm mē’â fə‘āmîm hălō’ ’ăḏōnî hammeleḵə kullām la’ḏōnî la‘ăḇāḏîm lāmmâ yəḇaqqēš zō’ṯ ’ăḏōnî lāmmâ yihəyeh lə’ašəmâ ləyiśərā’ēl:

4 ûḏəḇar-hammeleḵə ḥāzaq ‘al-ywō’āḇ wayyēṣē’ ywō’āḇ wayyiṯəhallēḵə bəḵāl-yiśərā’ēl wayyāḇō’ yərûšālāim:

5 wayyitēn ywō’āḇ ’eṯ-misəpar mifəqaḏ-hā‘ām ’el-dāwîḏ wayəhî ḵāl-yiśərā’ēl ’elef ’ălāfîm ûmē’â ’elef ’îš šōlēf ḥereḇ wîhûḏâ ’arəba‘ mē’wōṯ wəšiḇə‘îm ’elef ’îš šōlēf ḥāreḇ:

6 wəlēwî ûḇinəyāmin lō’ fāqaḏ bəṯwōḵām kî-niṯə‘aḇ dəḇar-hammeleḵə ’eṯ-ywō’āḇ:

7 wayyēra‘ bə‘ênê hā’ĕlōhîm ‘al-hadāḇār hazzeh wayyaḵə ’eṯ-yiśərā’ēl: f

8 wayyō’mer dāwîḏ ’el-hā’ĕlōhîm ḥāṭā’ṯî mə’ōḏ ’ăšer ‘āśîṯî ’eṯ-hadāḇār hazzeh wə‘atâ ha‘ăḇer-nā’ ’eṯ-‘ăwwōn ‘aḇədəḵā kî nisəkalətî mə’ōḏ: f

9 wayəḏabēr yəhwâ ’el-gāḏ ḥōzēh ḏāwîḏ lē’mōr:

10 lēḵə wəḏibarətā ’el-dāwîḏ lē’mōr kōh ’āmar yəhwâ šālwōš ’ănî nōṭeh ‘āleyḵā bəḥar-ləḵā ’aḥaṯ mēhēnnâ wə’e‘ĕśeh-llāḵə:

11 wayyāḇō’ ḡāḏ ’el-dāwîḏ wayyō’mer lwō kōh-’āmar yəhwâ qabel-lāḵə:

12 ’im-šālwōš šānîm rā‘āḇ wə’im-šəlōšâ ḥŏḏāšîm nisəpeh mipənê-ṣāreyḵā wəḥereḇ ’wōyəḇeḵā| ləmaśśeḡeṯ wə’im-šəlōšeṯ yāmîm ḥereḇ yəhwâ wəḏeḇer bā’āreṣ ûmalə’aḵə yəhwâ mašəḥîṯ bəḵāl-gəḇûl yiśərā’ēl wə‘atâ rə’ēh mâ-’āšîḇ ’eṯ-šōləḥî dāḇār: f

13 wayyō’mer dāwîḏ ’el-gāḏ ṣar-lî mə’ōḏ ’epəlâ-nnā’ ḇəyaḏ-yəhwâ kî-rabîm raḥămāyw mə’ōḏ ûḇəyaḏ-’āḏām ’al-’epōl:

14 wayyitēn yəhwâ deḇer bəyiśərā’ēl wayyipōl mîyiśərā’ēl šiḇə‘îm ’elef ’îš:

15 wayyišəlaḥ hā’ĕlōhîm| malə’āḵə| lîrûšālaim ləhašəḥîṯāh ûḵəhašəḥîṯ rā’â yəhwâ wayyinnāḥem ‘al-hārā‘â wayyō’mer lammalə’āḵə hammašəḥîṯ raḇ ‘atâ heref yāḏeḵā ûmalə’aḵə yəhwâ ‘ōmēḏ ‘im-gōren ’ārənān hayəḇûsî: s

16 wayyiśśā’ ḏāwîḏ ’eṯ-‘ênāyw wayyarə’ ’eṯ-malə’aḵə yəhwâ ‘ōmēḏ bên hā’āreṣ ûḇên haššāmayim wəḥarəbwō šəlûfâ bəyāḏwō nəṭûyâ ‘al-yərûšālāim wayyipōl dāwîḏ wəhazzəqēnîm məḵussîm baśśaqqîm ‘al-pənêhem:

17 wayyō’mer dāwîḏ ’el-hā’ĕlōhîm hălō’ ’ănî ’āmarətî limənwōṯ bā‘ām wa’ănî-hû’ ’ăšer-ḥāṭā’ṯî wəhārē‘a hărē‘wōṯî wə’ēlleh haṣṣō’n meh ‘āśû yəhwâ ’ĕlōhay təhî nā’ yāḏəḵā bî ûḇəḇêṯ ’āḇî ûḇə‘amməḵā lō’ ləmagēfâ: s

18 ûmalə’aḵə yəhwâ ’āmar ’el-gāḏ lē’mōr ləḏāwîḏ kî| ya‘ăleh ḏāwîḏ ləhāqîm mizəbēḥa layhwâ bəḡōren ’ārənān hayəḇusî:

19 wayya‘al dāwîḏ biḏəḇar-gāḏ ’ăšer diber bəšēm yəhwâ:

20 wayyāšāḇ ’ārənān wayyarə’ ’eṯ-hammalə’āḵə wə’arəba‘aṯ bānāyw ‘immwō miṯəḥabə’îm wə’ārənān dāš ḥiṭṭîm:

21 wayyāḇō’ ḏāwîḏ ‘aḏ-’ārənān wayyabēṭ ’ārənān wayyarə’ ’eṯ-dāwîḏ wayyēṣē’ min-hagōren wayyišətaḥû ləḏāwîḏ ’apayim ’ārəṣâ:

22 wayyō’mer dāwîḏ ’el-’ārənān tənâ-llî məqwōm hagōren wə’eḇəneh-bwō mizəbēḥa layhwâ bəḵesef mālē’ tənēhû lî wəṯē‘āṣar hammagēfâ mē‘al hā‘ām:

23 wayyō’mer ’ārənān ’el-dāwîḏ qaḥ-lāḵə wəya‘aś ’ăḏōnî hammeleḵə haṭṭwōḇ bə‘ênāyw rə’ēh nāṯatî habāqār lā‘ōlwōṯ wəhammwōrigîm lā‘ēṣîm wəhaḥiṭṭîm lamminəḥâ hakōl nāṯātî:

24 wayyō’mer hammeleḵə dāwîḏ lə’ārənān lō’ kî-qānōh ’eqəneh bəḵesef mālē’ kî lō’-’eśśā’ ’ăšer-ləḵā layhwâ wəha‘ălwōṯ ‘wōlâ ḥinnām:

25 wayyitēn dāwîḏ lə’ārənān bammāqwōm šiqəlê zâāḇ mišəqāl šēš mē’wōṯ:

26 wayyiḇen šām dāwîḏ mizəbēḥa layhwâ wayya‘al ‘ōlwōṯ ûšəlāmîm wayyiqərā’ ’el-yəhwâ wayya‘ănēhû ḇā’ēš min-haššāmayim ‘al mizəbaḥ hā‘ōlâ: f

27 wayyō’mer yəhwâ lammalə’āḵə wayyāšeḇ ḥarəbwō ’el-nəḏānāh:

28 bā‘ēṯ hahî’ birə’wōṯ dāwîḏ kî-‘ānâû yəhwâ bəḡōren ’ārənān hayəḇûsî wayyizəbaḥ šām:

29 ûmišəkan yəhwâ ’ăšer-‘āśâ mōšeh ḇammiḏəbār ûmizəbaḥ hā‘wōlâ bā‘ēṯ hahî’ babāmâ bəḡiḇə‘wōn:

30 wəlō’-yāḵōl dāwîḏ lāleḵeṯ ləfānāyw liḏərōš ’ĕlōhîm kî niḇə‘aṯ mipənê ḥereḇ malə’aḵə yəhwâ: s


Next: 1 Chronicles (1 Divrey Yamim) Chapter 22